منیم ائلیم قاشقایی
منیم ائلیم قاشقایی...
یاز اولاندا یازیلاندا گؤی داغلار
منیم ائلیم قاشقاییدان یاد ائدینگ
گول جوشاندا گولوشنده بولاغلار
منیم ائلیم قاشقاییدان یاد ائدینگ
یای اولاندا ائل یایلاغا چاتاندا
یاییق یایماگینا چاتما چاتاندا
گؤی چمنه توی چادیری دوتاندا
منیم ائلیم قاشقاییدان یاد ائدینگ
پاییز چاغی پوزولاندا گول باغی
تؤکولنده گولونگ رنگی یاپراغی
گئدن آغیر ائلینگ گئتمگی چاغی
منیم ائلیم قاشقاییدان یاد ائدینگ
قیش اولاندا قویون قاشا یاتاندا
چوبان چؤله چیگیلینی آتاندا
آغیر ائلینگ گونو گئدیب باتاندا
منیم ائلیم قاشقاییدان یاد ائدینگ
گؤ رنده ائل لرینگ باشیندا قایی
ساغیندا سولوندا قاشیندا قایی
اوخویاندا اورخون داشیندا قایی
منیم ائلیم قاشقاییدان یاد ائدینگ
ساق قایی دان او رستم ـ ی یلیندن
سول قایی سلجوغونگ تورکو دیلیندن
هر یئرده گلدی سؤز قایی ائلیندن
منیم ائلیم قاشقاییدان یاد ائدینگ
دوو دوشنده مصاف وقتی اولاندا
قوچ ایگیدلر وورهای وورو سالاندا
شهیدلرینگ انتقامین آلاندا
منیم ائلیم قاشقاییدان یاد ائدینگ
سهرابخاندان او قیلیجی جانستان
گوم بورونو بوکن الله وئردیخان
او صولت دن یاد اولاندا هر زمان
منیم ائلیم قاشقاییدان یاد ائدینگ
شیعه مرامیندان مذهب ـ ایماندان
فقاهت دن فلسفه دن عرفاندان
سؤز گلنده، حکیم جهانگیر خاندان
منیم ائلیم قاشقاییدان یاد ائدینگ
بحث اولاندا تحصیلات ارزشیندن
بهمن بیگی افسانه سی ایشیندن
ذکر اولاندا ائل لر آموزشیندن
منیم ائلیم قاشقاییدان یاد ائدینگ
یاز اولاندا یاد ائدنده گؤی داغی
پاییز چاغی پوزولاندا گول باغی
"نادم" دئیه ر: یای گونلری قیش چاغی
منیم ائلیم قاشقاییدان یاد ائدینگ...
بهمن ۸۶ شیراز
